Kaulana ka inoa ʻo Panaʻewa
Home uluwehiwehi o ka lehua
​
Paipai ka lehua lā i luna
No ka lei mikioi, pili a paʻa

A he nani ka ʻōiwi a ka noʻeau
Naʻu nō e lei no nā kau a kau

ʻOhuʻohu Hilo i ka moku lehua
Pōhai ke aloha i ka hoʻopulapula

ʻIke ʻia i ka nani ʻo Panaʻewa
Home uluwehiwehi o ka lehua

​
So renowned is the name Panaʻewa
Beautiful home of the lehua blossoms

The lehua are lifted on high here
Reserved only for finely-made garlands to be cherished

So fine in appearance and skill
It will be something that I will wear forever

Hilo is adorned by this lehua forest
Love encircles this homestead of ours

Panaʻewa’s beauty is known by me and my family
Our beautiful home of lehua
_
A message from the Haku Mele:
He mele aloha kēia no ka hoʻohāliʻaliʻa ʻana i ka nohona o koʻu Pāpā ma Panaʻewa i kona wā kamaliʻi. ʻO Paipai, Mikioi, Pilipaʻa, Noʻeau, ʻOhuʻohu a me Pōhai nā inoa alanui o Panaʻewa kūlanakauhale. Hoʻohana māua ʻo kuʻu wahi makua i ia mau inoa alanui i mea e hōʻike ai i ka nani o nā ʻohana e noho ana ma ka ʻāina hoʻopulapula – me he pua lehua wehiwehi lā o kekahi lei nani a hiehie hoʻi. He mea lawe nūpepa ʻo Pāpā i kona wā ʻōpio a pēlā i kamaʻāina ai nā ʻohana o nēia ʻāina iā ia. Aloha nō au iā ʻoe, e Pāpā, a mahalo i ka hōʻike ʻana i ka nani o kou ʻāina hānau, ʻo ia hoʻi kuʻu wahi ʻāina kupuna.