Ahuwale e ka uʻi o Kalani
Kahanu aliʻi wahine
Milimili a Kaleiwohi
Lei o Keaweaheulu

Laʻi ka nohona hoʻopulapula
I ka malu kiawe
Koʻiawe ua Nāulu
A i Lualualei

Loa ka piʻina kakahiaka
Heleakalā hiehie
I hoa Puʻuohulu
Me ka Inuwai o Mikilua

Lohe ka hoene a ke kai
ʻO kaʻu e liʻa nei
Pā kāhea kamaʻāina
E kono mai ana a e kipa

ʻO ʻoe ka wewehi o ka ʻāina
Luakaha a ka lehulehu
Hea aku mākou, ō mai ʻoe
Kahanu ka wahine ana ʻole

Completely apparent is the beauty of the Chiefess
Princess Kahanu Kalanianaʻole
Darling child of Kaleiwohi
A descendant of Keaweaheulu

Homestead-life is blissful
In the shade of the kiawe
The Koʻiawe rain falls
Upon Lualualei

It’s a long morning climb
Up magnificent Heleakalā
A partner for Puʻuohulu
With the Inuwai wind of Mikilua

The rustle of the shore is heard
And I long to be there
The locals call out
Inviting me to join them

You are the beauty of the land
Beloved by all its people
We call to you, answer us
Kahanu, the incomparable woman
_
A message from the Haku Mele:
He pōmaikaʻi a haʻalele loa nā ʻāina hoʻopulapula a ke Kamāliʻi Kāne Kūhiō Kalanianaʻole e hoʻopūnana ai a e laupaʻi aʻe ai hoʻi nā ʻohana Hawaiʻi e noho nei. ʻO ka ʻāina nō paha ke aliʻi kumu kahi e kahua ai ka makeʻe aliʻi ʻoiaʻiʻo o nā Hawaiʻi, a pēia hoʻi i haku ʻia ai nei mele hoʻohanohano aliʻi no ke Kamāliʻi Wahine Kahanu Kalanianaʻole: he mele hoʻohanohano ʻāina. ʻO ke Aliʻi Wahine ia a ua ʻo Kalanianaʻole Kāne, i kapa ʻia ai ka ʻāina hoʻopulapula ʻo Princess Kahanu Estates e waiho lā i ka houpo o ka ʻāina ʻo Ulehawa—ma waena a ma kai iho o Heleakalā a me Puʻuohulu, nā kiaʻi nō paha o ia kaha o Waiʻanae. Ma ia wahi pili kai nō hoʻi e luana ai kānaka, me ka hea maʻamau hoʻi o ko laila mau kini, e kipa a luana pū. Ke aloha ia a ka Hawaiʻi!