He aloha kuʻu ʻāina ‘o Papakōlea
I ka malu o ʻUalakaʻa me Puʻu ʻŌhiʻa
Uluwehiwehi ʻoe i ka pua melia
A he lei poina ʻole no nā kupa ʻāina

He aloha kuʻu ʻāina ‘o Kalāwahine
Ke kiaʻi no ke kukui o Kamoʻopili
ʻO ka ua Lanipili e iho mau ana
I ka nani hiehie aʻo Kauhulinoa

He aloha kuʻu ʻāina ‘o Kewalo Uka
Me ka wai pūlama ʻia o ʻAuwaiolimu
ʻAlawa aʻe kuʻu maka iā Pūowaina
Ia ʻāina hanohano o ka lehulehu

He aloha kuʻu ʻāina hoʻopulapula
Kulāiwi hoʻohenoheno o nā Hawaiʻi
Mahalo iā ʻoe e Kalanianaʻole
Ke aliʻi makaʻāinana o ka lāhui

Beloved is my land of Papakōlea
Protected by ʻUalakaʻa and Puʻu ʻŌhiʻa
You are festively adorned with plumeria
An unforgettable lei for the native people

Beloved is my land of Kalāwahine
A guardian for the kukui of Kamoʻopili
The Lanipili rain will continue to fall
Upon the distinguished beauty of Kauhulinoa

Beloved is my land of Kewalo Uka
And the treasured waters of ʻAuwaiolimu
My eyes glance upwards at Puōwaina
To this honorable land of the multitudes

Beloved are my homestead lands
Cherished homeland for the Hawaiians
Gratitude for you, Kalanianaʻole
The citizen prince of the Hawaiian nation
_
A message from the Haku Mele:
He mele aloha ʻāina kēia no nā ʻāina hoʻopulapula ʻo Papakōlea, Kewalo Uka, a me Kalāwahine. Ua hānau a hānai ʻia ʻo Laʻamea Paleka lāua ʻo Kahanuola Solatorio ma ia mau ʻāina hanohano, a palena ʻole ko lāua aloha no nā ʻāina, nā moʻolelo, a me nā kupa o ia ʻāina hoʻoheno. Ua makemake ‘o La‘amea lāua ‘o Kahanuola e hōʻike pū i ka mahalo no ko kākou aliʻi makaʻāinana, ʻo ia hoʻi ʻo Prince Jonah Kūhiō Kalanianaʻole ma o kēia mele kekahi, no ka mea ua hoʻokumu ʻia ka Hawaiian Homes Commission Act e ia i ka lā 9 o Iulai i ka makahiki 1921. Ua noʻonoʻo ʻo Kalanianaʻole i ke ola pono o kona lāhui mai kēlā wā a i kēia mau lā a me nā hanauna he nui hou aku e hiki mai ana. He aloha kuʻu ʻāina ʻo Papakōlea, ʻo Kewalo Uka, a ʻo Kalāwahine.